Музеј на Македонија

Музејот на Македонија е национална институција во Македонија и еден од најстарите музеи. Се наоѓа во Старата скопска чаршија, во близина на Скопското кале. Музејот на Македонија е создаден со вкрстување на три музеи во еден. Трите музеи беа археолошкиот, историскиот и етнолошкиот музеј, од кои археолошкиот музеј беше најстар - тој беше отворен во 1924 година и таа година се смета за година на основање на националниот музеј. За време на Социјалистичка Република Македонија, музејот беше познат како Народен музеј на Македонија.

Музејот располага со вкупна површина од 10.000 м², од кои 6.000 м² се наменети за постојани или повремени изложби. Институцијата има комплексен карактер, што значи дека собира, чува, конзервира и презентира национално македонско историско и културно наследство.